ايهاب رشدى 
قال الدكتور مجدى اسحق استاذ المشورة و الارشاد النفسي أن عربية الإسعاف عندها ألف حق و حق لأن حياة مريض في خطر : سواق مستعجل و علي آخر درجة قلق، سارينة متواصلة ، سرعة رهيبة ، لو عربية ما وسعتش يزمر لها تاني و تالت و عاشر ، و ما يهداش إلا لما يسبق الريح لان الثانية بتفرق..
 
وتابع استشارى الارشاد النفسى بأن  فيه ناس عايشة حالة "الاسعاف " في السواقة  من غير أي سبب .. جري و عصبية و كلاكسات و نرفزة و غرز ؛ يا تري ليه و مستعجل علي ايه؟؟
 
هل بيحاول يطلع طاقة غضبه علي الناس ، جايز .. هل السواقة دي هي المجال الوحيد اللي بيحس فيه بقوته و تفوقه بعد يوم مليء بالإحباطات، برضه جايز .. هل عاوز يثبت للي راكب (او راكبة معاه ) انه بطل خارق و عنتر زمانه، جايز جدا .. المهم هو بيعرض حياته و حياة اللي معاه و اللي سايق جنبه للخطر علشان يوفر له كام دقيقة ما لهمش اي لازمة و لا معني ..
 
وأضاف دكتور اسحق بأن هناك أيضا  "متلازمة اسعاف" يعيشها  ناس جوه يومهم ، من غير ما تسوق عربيات ..
 
زعيق و صويت، عصبية و عنف، تسارع و تسرع و جري من غير هدف، خناق مع الكل ، هو متوتر و موتر الكل حواليه..
صاحبنا ده اللي مشغل سارينة القلق عيان ، قلقان .. و كل اللي بيجري عليه ووراه تعبان منه و تعبان عليه ..
 
يا صديقي ، كله ح يخلص احسن بروقان البال ، من غير وجع القلب اللي انت فيه ..
 
خد الدنيا علي مهلك من غير رمح و هري، اعمل اللي تقدر عليه و اللي ما يتعملش اليوم اعمله بكره بدماغ رايقة .. استمتع بيومك و اتهني بوقتك انت و بيتك وولادك..
 
اشتغل هادي و اتكلم هادي و سوق هادي .. سيب عربية الإسعاف دي خالص ، و اشتري راحة بالك بالهدوء و الوداعة ..
حتوصل أسرع، و تعيش أحلي، و تخلص اللي وراك أسرع و اتقن، و  تحافظ علي عقلك من القلق و علي قلبك من العيا و علي جسمك من العجز و علي عيلتك من الخلاف .