الجوكر..

آرثر بيشتغل مهرج.. كوميديان بيعمل فقرة ضاحكة فى بعض الملاهى والمدارس والشوارع أيضاً.. بنشوفه فى أولى مشاهد الفيلم بيتعرض لتنمر وعنف جسدى ولفظى من بعض الشباب فى الشارع.. بعدها ده بيتكرر من زمايله فى الشغل.. وبيتكرر تانى من ثلاث شباب أثرياء فى المترو..

 

أحد أسباب اشتغال (آرثر) بالشغلانة دى هو طلب والدته منه باستمرار وهو صغير انه يفضل راسم ابتسامة على وشه طول الوقت.. ويينتهى يوم آرثر المعتاد بالجلوس مع والدته العجوز أمام التليفزيون لمشاهدة برنامجهم الكوميدى المفضل..

 

آرثر كان بيتعالج نفسياً.. مزيج من الاكتئاب والفصام واضطراب العرات (الحركات اللإرادية- فى صورة نوبات متكررة وغير مفهومة من الضحك والقهقهة).. وتكتمل مأساته بأن الخدمات الاجتماعية توقف دعمها لجلساته وتمويلها لعلاجه الدوائى، المكون من 7 أصناف نفسية.

 

حتى الوقت اللى حاول فيه آرثر يرفه عن طفل فى مواصلة عامة.. وصلته رسالة قوية وقاسية (بالرفض) من أم هذا الطفل.. حتى المرة اللى وقف فيها قدام جمهور راقى فى مسرح فخم.. جاتله نوبة الضحك المرضية منعته من الكلام وبوظت عليه فقرته.. حتى البنت اللى قابلها فى المصعد وأعجب بيها.. أول اشارة منها ليه كانت مليئة بالبؤس واليأس وانعدام الرجاء.. لما رفعت إيديها ناحية راسها فى شكل مسدس وكأنها عاوزة تنتحر من كتر ضغوط الحياة عليها وعلى بنتها.. 

 

علشان ده وغيره كتير، كانت الجملة اللى كاتبها (آرثر) ومكررها فى أجندة دعاباته (أتمنى أن يصنع موتى فرقاً أفضل من حياتى).. وفى اللحظة دى يعرض عليه أحد زملاؤه فى الشغل مسدس يخليه معاه علشان يدافع بيه عن نفسه وسط اضطرابات المدينة وعنفها المتصاعد.. ولسوء حظه المعتاد يقع المسدس من جيبه أمام الأطفال فى أحد عروضه الكوميدية بالمستشفى، ويصبح فى موقف حرج وغريب وغير مبرر.. ليتم فصله من عمله..

 

آرثر بيكتشف بالصدفة إن والده رجل أعمال شهير كان على علاقة بوالدته لما كانت شغالة عنده من سنوات طويلة.. بيشوف الجوابات اللى بتبعتها أمه ليه بشكل شبه يومى من سنين بتطلب منه يعترف بابنه ويهتم بيهم ويساعدهم فى نفقات الحياة اليومية.. آرثر يروح للراجل قصره.. ويقابل (فى مشهد بديع) ابنه الصغير المهندم اللى باين عليه علامات الثراء والاهتمام والرفاهية.. بيقابله وبينهم سور حديدى ضخم.. بيفصل فى رمزية واضحة بين الحياة اللى بيحلم بيها آرثر وبين حياته الحقيقية على أرض الواقع.. 

 

الأب بيرفض الاعتراف بابنه.. مش بس كده.. ده بيلكمه على وشه بكل قسوة وجحود.. ويقوله إن أمه أصلاً مش أمه.. وانها كانت عاوزة تتبنى طفل.. وكانت مصابة باضطراب عقلات تسبب فى ضلالات وتهيؤات أنه هو أب الطفل المتبنى.. وحكاية فى منتهى الغرابة..

 

آرثر راح مستشفى المدينة.. ووصل لسجلات والدته.. واتأكد انها فعلا مريضة.. وكانت محجوزة فى المستشفى.. وانه مش ابنها.. وانه فعلاً طفل لقيط مالهوش أهل.. وانه تعرض وهو صغير منها ومن صديقها لضرب وإهانة وسوء معاملة أدت بيه لإصابة فى المخ.. وهنا كانت نهاية آرثر اللى احنا نعرفه.. أو حتى اللى هو يعرف نفسه.. وبداية آرثر جديد تماماً.. 

 

انتهى آرثر الحزين البائس المتردد.. وخرج منه آرثر المارد الجبار المنتقم.. ذهب آرثر الكوميدى المداعب المبتسم. رغم أحزانه.. وحضر آرثر الساخر اللاذع القاسي رغم ضعفه.. اختفى آرثر المكسور الجريح منحنى الظهر.. وظهر آرثر المغرور المتعالى منتصب الجسد.. تغيير كامل فى الشخصية.. والتركيبة.. والهيئة.. لكنه وبكل أسف.. تغيير للأسوأ..

 

آرثر تحول إلى مجرم.. سفاح.. قاتل محترف.. قتل الست اللى كان فاكرها أمه.. والراجل اللى تصور إنه أبوه.. قتل طبيبته النفسية.. قتل شباب المترو.. وقتل المذيع اللى كان بيحبه.. 

 

آرثر قرر أن يقتل العالم.. ويحرق الكرة الأرضية..

لأنه مالقاش حد ينتمى ليه..

أيون..

مالقاش حد ينتمى ليه..

 

مشكلة آرثر (الجوكر) مش بس إنه تعرض للتنمر والعنف اللفظى والجسدى من كل من حوله.. لأ.. مشكلة آرثر الحقيقية هى انه فقد أى حد وأى حاجة ممكن ينتمى ليها.. 

 

الفيلم مش عن التنمر وأثره فى حياة الإنسان.. ده كلام يتقال ببساطة فى الجرايد والمجلات وبرامج التلفيزيون.. الفيلم فى عمقه عن (هو انت بتنتمى لمين؟ هو انت بتنتمى لإيه؟

 

عندك إجابة على السؤال ده؟

طيب..

 

نقول كمان..

هو انت بتنتمى لحد؟

 

مين آخر حد انت فاكر انك انتميت ليه؟

واللا انت مقرر من جواك انك تعيش (لامنتمى)؟

 

فى هرم (ماسلو) للاحتياجات الإنسانية.. (الانتماء) بييجى فى الترتيب التالى على طول بعد تلبية الاحتياجات البيولوجية من أكل وشرب وملبس، بعدها الشعور بالأمان والاطمئنان والاستقرار.. 

 

المقصود بالانتماء هو الانتماء لعيلة.. لمجموعة.. لشلة أصحاب.. 

الانتماء لأرض.. لناس.. لوطن.. لدين..

 

الانتماء لحبيب.. الانتماء لصديق.. أو حتى الانتماء لفكرة..

احنا محتاجين مانحسش اننا لوحدنا.. محتاجين مانحسش اننا