ماجدة سيدهم
علشان نتفق من الاول التغيير الوحيد اللي حصل بعد ثورتين ان مجلس الشعب بقى اسمه برلمان ..اشمعنى بلاد برا(بصوت سمير غانم ) ..وكمان كنا حانموت ونرجع جلس الشورى بس باسم جديد مجلس شيوخ فخيم ..برضه اشمعنى بلاد برا ..
مش مهم بنعمل إيه تحت القبب دي .. مدام كلنا مدهولين ونايمين تحت قبة أو تحت لحاف مش فارقة ..مادام الحهل في الحالتين بيغطينا ..
طيب سؤال ..هل احنا. استفادنا حاجة محترمة من اعضاء البرلمان دول ..أو حاسينا ببهم أو محتاجينهم في حاجة ..يبقى مالوش اي ستين لازمة البرلمان دا ولا اللي بعده ..
برلمان أغلبه بعقلية ذكورية بحته ..عار عار على بلد بقيمة مصر اللي هدوا حيلها من كتر ماغتصبها الحرامية والخونة ..اللعنة عليكو وعلى كل مسؤول جاهل وخاين للشعب ..
علشان كل شوية يطلع علينا اللي عاوز يعمل كشف عذرية على البنات قبل دخول الجامعة ..واللي كانت عاوزة تقنن استيراد الملابس الداخلية الحريمي ( اللانجيري الابيح ) دا على اساس أن الشعب المعدوم بيلبس ماركات ..واللي ماسكين على بعض فضايح جنسية ..واللي عاوزة غرامة على اللبس غير المحتشم .. (دا اللي هو ازاي يعني يا أبلة عجمي )
هي دي ياسادة عقلية أعضاء برلماننا الموقرين ..دي قضاياهم ..هو نفس فكر الشيوخ الموقرين برضه بتوع حفظ الفروج .. .فكر ذكوري أصيل ومنحط متوزع ماببن اشباه الرجال واشباه النساء تحت نفس القبة وبرا القبة كمان ..
هم دول نوايبنا اللي اخترناهم وبنرفع صوابعنا علامة النصر كمان ،(مش عارفة بنكيد مين ) ..يعني م الآخر جاهل وأمي بيختار جاهل وأمي زيه بس أغنى منه أو فهلوي عنه ..بس كدا ...
المحزن ان التصريحات المهينة في حق الستات طيلة الفترة الماضية لم تزعج اغلب الستات خصوصا بتوع حقوق المرأة وصوت المراة مش عورة...لا حس ولا خبر لان الجهل غلاف المجتمع كله
برلمان فضيحة ..فمابالك من اختيار الستات من بتوع الكوتة ..قص ولزق .. اختيار عرة ويكسف .. الوقت للاسف بيجري والسنين بتمر والحال من سيء لأسوأ ..وماحدش يقولي شوية شوية ...
ماعندناش كفاءات صح ( خصوصا الستات) يبقى بلاها برلمان ..مش فارقة
البلد دي ان محتاجة عقلية متحررة .. مفكرة...سليمة نفسيا عقلية فلسفية وابداعبة ..عقلية تحليلية مستقبلية ..مجازفة ومبتكرة.. محطمة كل حصون الجهل ومعابد التخلف وقلاع الخوف ..عقلية تعرف تبني من الحطام شعب متحضر ونشيط ومنتج.. عقلية تعرف قيمة الوطن بجد ..
غير كدا لا خلاص لنا ولا مستقبل لنا..واعلنوها سلفية بوضوح ..بس احذروا العواقب ..الناس على اخرها
