محمود ابو اليزيد
( اول حاجه عايز اقولهالك يابني اوعي تكون قاضي ظالم علي الناس اياك تحكم بكفر حد او تحكم بتحريف كتاب حد طالما مترضهاش علي نفسك يابني
ايوه اسمع كلامي اتعلم ياولدي انك تصاحب الجميع واياك تفرق بين انسان وانسان علي اساس دينه او لونه او جنسه ده اخوك ياحبيبي اللي خلقكم واحد اياك تقتل يابني وان جه القتل في راسك اتذكر علي طول وصيه من وصايا النبي موسي :لاتقتل
واياك تزن ياولدي او تحلف بربنا باطل
وخليك دايما عون للمحتاج وعشان تزيد من تحفيزك للخير ده اقرا بسرعه موعجه الجبل للمسيح وركز اوي يابني لما قال طوبي للرحماء لانهم يرحمون ،خليك دايما واثق ان ربنا في ضهرك يابني في صنع الخير وضدك دايما في الشر اسمع وركز يابني وانت بتقراء موعظه المسيح علي الجبل واقراء كويس حياه المسيح واتعلم ازاي كان رحيم بالناس كان بيسامح رغم الالم
خليك ياولدي دايما تعفوا عند المقدره واقرا حياه نبيك محمد (ص) لما اصبح ذا قوه وجاله اللي عذبوه وافتكره انه هيعذبهم زي ماعملوا فيه لكن كان رده ليهم اذهبوا فأنتم الطلاقاء دايما يابني اتعلم انك المسيحي اخوك واليهودي اخوك والملحد اخوك واي انسان هو اخوك واياك تؤذيه عشان معتقده او اختلافه معاك متسمعش يابني كلام اللي بيكفروا خليك دايما زي ابوك يقول: في ربنا بيحكم انا مش قاضي احكم علي الناس بالكفر والايمان
دايما يابني تحترم كل بيوت ربنا انت اه مسلم بس دول اماكن عباده ربنا زورهم واتعرف عليهم احنا مش عايشين لوحدنا يابني وان لقيت في مشكله بسبب ان اخوك مش لاقي مكان يصلي فيه افتح بيتك لصلاته ولشعائره ايا كان دينه ودايما يابني اقرا قصه اعظم سيده علي الارض مريم العذراء اللي ربنا اختارها دونا عن نساء الارض عشان تحمل في المسيح اقرا صورتها من القرءان
اتعلم يابني دايما من سير المسيح وموسي ومحمد
انهم جائوا مخلصين ورحماء ومنقذين
فتعلم ياولدي انه في العقيده المسيحيه ان المسيح جاء للخلاص من الخطيئه وان موسي جاء لخلاص العبرانيين من ايدي الفراعنه وان محمد جاء رحمه للعالمين
فتعلم منهم ان تكون ملخصا لشخص لجاء اليك في ورطه تكون منقذا تكون رحيما به
تعلم ياولدي ان دايما اخواتك المسيحين عندهم بطريرك حكيم ابوك عاصر كذا بطرك منهم عاصر البابا شنوده عاصر الانبا باخميوس القائم مقام البطريرك عاصر حكيم مصر البابا تواضروس صدقني يابني الناس دي انا مشوفتش منهم غير كل محبه وكل تعاليم المسيح كانوا بيطبقوها بالحرف الواحد
وزي ماتحب شيخك اللي بيحفظك القرءان تحب القسيس وتبوس ايده زي عمك الشيخ بالظبط
اتعلم واعود ان ميكونش ليك اعداء دايما خلي اعدائك هم الظلم والجهل والمرض وخلي دايما هدفك الحق والمحبه والعدل واياك تسكت عن حق
وانا مش بقولك اياك بحذرك دانا بنصحك عشان يكون ربنا راضي عنك وعشان تبقا وسط الناس ناشر خير ومحبه تبقا نور العالم زي ما المسيح قال)
عارف يابني ابوك اتعلم من دينه الرحمه ومن المسيحين المحبه وكل انسان في الدنيا يابني هتتعلم منه
فااوعي تحكم علي حد من مجرد سماعك عنه
اتعلم اقرا ناقش افهم وبعدين احكم وخليك عادل في حكمك يابني
ابوك مقتنع جدا بشويه حاجات دايما حطها في راسك
ابوك معتقد ان كل انسان عند ربنا ليه جزائه وان مش لانك تختلف معايا في الدين فأنا احسن منك وهدخل الجنه وانت لا
لا يابني الجنه مش حكر علي حد والجنه دي باايد ربنا مش بأيد بشر يحكم بدخولها او لا
ابوك عمره ماهيحكم بتحريف كتاب احد ايا كان
فالله انزل كتبه وهو قادر علي حمايتها من التحريف
ابوك اتعلم ان مش كل اللي مش من دينك هو عدوا لا في ناس في دينك بيبقوا اعداء لمجرد كونك انسان واعداء لدينك نفسه
اتعلم واقرا يابني وانشر سلام ومحبه وخليك نور العالم
