هو مين اللي عملها؟

 

وناس كتير افتكرت أن معنى كلامي أني بدين كل أصحابي المسلمين، رغم اللي يعرفني كويس برضه هيبقى عارف أني عمري ما بصيت للأمور كده ويشهد عليا كل أصحابي أو الناس اللي بتتعامل معايا، والكل عارف أني بقول صلي على النبي زي ما بقول مجد سيدك بالضبط.

 

كل ده مش مهم، المهم أني كنت عاوز أقول إن اللي يختصر أي دين في أفعال بعض الاتباع يبقى لا مؤاخذة "متخلف"، آه والله، متخلف، عارف ليه؟؟؟

 

أنا كواحد من الناس في وقت من الأوقات لما كان بيتدرسلي قصة صلاح الدين لما حارب الصليبيين كان فيه ناس بتبصلي بصة ده أنتوا كنايسكم بتحتل ومعرفش إيه! مع أن فعلًا عمر ما مسيحنا قال كده، فطبيعي لما كان فيه قادة بيعملوا كده، مش معناه أن ده الدين المسيحي أو المسيحية عامة.

 

ونفس الكلام ينطبق على تعاليم الإسلام، مش معنى أن البعض بياخد بعض النصوص اللي على كيفه علشان يولع بيها فتنة أنه ده صح! لا ده إرهاب، زي اللي الصليبيين كانوا بيعملوه، وفي كل الأحوال الاتنين تجار دين وفاكرين أنهم بيحموا دينهم وبيرفعوه، وهما أصلًا بيشوهوه.

 

أما بالنسبة لحبايبي بقى بتوع تحريم الترحيم أو فكرة أصل دول كفار، أنا عاوز بس أفهمك أننا أهل كتاب، ودينك بيقولك إن حتى مينفعش تجادلني إلا بالتي هي أحسن، وطالما معملتش أي هجوم على دينك أنت متقدرش تهاجمني، وفي نفس الآية بيقولك إن إلهي وإلهك واحد، يعني مش كافر زي ما بتقول، كل الموضوع أني اقتنعت بالمبادئ المسيحية أكتر وحبيت أعيش بيها.