الأقباط متحدون - عميل وكمان صفيق!!!
أخر تحديث ١٠:١٥ | الاربعاء ٢٦ مارس ٢٠١٤ | برمهات ١٧٣٠ ش ١٧ | العدد ٣١٤٠ السنة التاسعه
إغلاق تصغير حمل تطبيق الأقباط متحدون علي أندرويد
شريط الأخبار

عميل وكمان صفيق!!!

مينا ملاك عازر
لا أستطيع أن أتهم أمير قطر تميم بأنه منقلب على أبوه، فهو وأبوه منفذان لإرادة أمريكية يعني الملك في الشطرنج لما بيبدل مع الطابية نقدر نقول على الطابية أنها منقلبة؟ هي بتنفذ إرادة المحرك لقطع الشطرنج، هما كده برضه، يبدل مع أبوه ما يجراش حاجة، ترقي أمريكا العسكري بملك، مافيش ملكة المهم حد يبقى قاعد على كرسي إمارة قطر، بينفذ أحلام أمريكا وخلاص، لذا لن أوجه الكلام لأمير قطر على أنه منقلب لأبوه لكن مشكلتي معه أنه عميل، ولو كان عميل فيما يخص بلده تبقى حاجة تخصه وتخص بلده لكن مشكلتي معاه إنه عميل على مستوى دولي يعني أثره التخريبي ممتد وشامل.

وتراه ينخور كالسوسة في بنيان الدول الأخرى، تلاقيه مادد ايده بيحاول يخرب في مصر ويقوم بإللي فشلت جماعته الفاشلة الخاينة بالقيام به إبان حكم راجلها بالقصر الجمهوري بمصر، الأكادة بقى إنه بيتطاول على من يسميها بالشقيقة الكبرى، شقيقة كبرى منين يا عميل؟ وإنت بتقول عليها إنها فشلت في الوحدة الوطنية وأنها مخطئة في تسمية ما يجري بها إرهاباً!!؟ وذلك أثناء القاء كلمته في القمة العربية حين وصف الإرهاب بأنه أعمال عنف وموجهة لمؤسسات مدنية لأغراض سياسية، يا حبيب مامتك يعني التفجيرات ضد الجيش والشرطة نسميها إيه؟ ضرب نار بمناسبة الأفراح!؟ يعني على كده مش من حق البلد إللي موصلاك لكرسي حكمك، مش من حقها إنها تعتبر إن هجوم الفلسطينين على جنودها إرهاباً؟ طب وهي موافقة على كده، ولما هي موافقة على كده ليه معتبرة حماس جماعة إرهابية؟ وليه إنت مش بتفهمهم الصح إيه؟ ولا لسانك بلعه معاهم ليه؟ طبعاً لإنك عارف إنهم لو غضبوا عليك حايخلوك تمسح حمامات أو تلمع عربيات في إشارات المرور في مصر لإن مافيش دولة حاترضى تلمك لما يغضبوا عليك، غيرها عارف ليه لإنها الشقيقة الكبرى بجد مش بالكلام من واحد صفيق زيك.
على كل حال العيب مش عليك العيب على القمم العربية إللي رضيوا يقعدوا مع عيل زيك، مالهش في السياسة ويتكلموا معاه يا خسارة العرب بعد وصول أطفالها لسدة حكم بعض بلادها، الخلاصة أنك تستطيع أن تدرك وتتأكد بعد كلمة أمير ما تسمى قطر أمام القمة العربية الأخيرة إنه مش بس عميل لا ده كمان صفيق بيتطاول على أسياده وكبار قومه، وده يوحي بأن العيب كمان على إللي ربوه وسابوه يغلط في خلق الله.
المختصر المفيد الأحمق هو الذي لا يرى عيباً في نفسه فيسيء لنفسه، ويتطاول على من هم أكبر منه.

 


More Delicious Digg Email This
Facebook Google My Space Twitter