كتب – محرر الاقباط متحدون ر.ص
قال الكاتب الصحفي كمال سيدرا ، فيه ناس بتتفرج علي الأجواء الساخنة والتي تنبأ بحرب إيرانية أمريكية خليجية وعربية، وكأنهم بيتفرجوا علي ماتش كورة ومتحمسين جداً للمتابعة والتشجيع، حابب بس الناس تحط معلومات مهمة في دماغها، الحرب يعني دمار وموت أباء وأمهات وأطفال وكبار سن، وأكثر من يعانوا في الحروب هما المدنيين، لا الخوميني ولا ترامب ولا ملك السعودية.
وتابع "سيدرا"عبر حسابه الشخصي على موقع التواصل الاجتماعي (فيسبوك)،:" لا قدر الله وابتدت حرب، المصريين هيعانوا كتير، أولاً لان ملايين المصريين بيشتغلوا في منطقة الخليج يعني شغلهم ودخلهم ودخل أسرهم وجزء مهم من دخل البلد ممكن يتقطع، ده بخلاف خطر الحرب علي حياتهم، والسياحة كمان هتنضرب لان السائح مش خبير جغرافيا وعارف أن الخليج بعيد عن مصر كله عنده اسمه الشرق الأوسط، وسوف تتبعه الاستثمارات.
وأوضح ، كمان الدعم الخليجي هيقل لان ترامب هيحلب دول الخليج أسلحة وتكلفة جيشه علي حسابهم وهما الداعم الأول مالياً حالياً لمصر (أو النظام المصري)، ده طبعاً بخلاف أن السيسي متوقع يدخل الحرب كجزء من التحالف العربي بضغط من حلفائه الأمارات أو السعودية وضغط من أمريكا. واختتم :"ده بخلاف الملاحة في قناة السويس، واشتعال المنطقة كلها بحرب بالوكالة في دول كتير بين أنصار إيران وأنصار السعودية، في بعض الأحيان الواحد بيبالغ لما بيقول علي تصرف أو شخص انه شر، لكن الحرب هي الشر المطلق، وخراب ودمار وموت، ربنا يرحمنا جميعاً ويقينا والعالم شر الحرب.
