على الأنترنت مرثية مكاريوس "أسمي مكاريوس..قبطي صعيدي..حتى شوف الصليب بأيدى

ماريا ألفي إدوارد | 2010-11-28 00:00:00

كتبت: ماريا ألفي
تضامنًا مع الحادث الأليم الذي وقع حدث بكنيسة العذراء والملاك بـ"العمرانية"، قام احد الشباب بكتابة"كلمات شعرية مؤثرة" على لسان الشهيد"مكاريوس جاد شاكر"، وتم تداول الكلمات الشعرية على الموقع الشهير"اليوتيوب" .
هذا وقد قام بالأداء الصوتي: مينا سيفين، والأشراف فني: بافلي بولس .
وتقول الأبيات الشعرية الآتي :
*أنا اسمي"مكاريوس"قبطي صعيدي حتى شوف الصليب على إيدي
*غلبان..زيك تعبان..ماشي في حالي جنب الحيطان..ولا جاش في بالي إني هموت غرقان.
*غرقان في دمي..طب والست أمي..مين هيبعت القرشين..أنا من زمان شقيان.. ومت قبل ما أكمل العشرين.
*أنا أسمي"مكاريوس جاد"عايش في الدنيا بالكاد..أتعلمت من صغري الصبر والاجتهاد..لا أعرف مين سارقها..ولا مين حارسها..ولا على فين رايحة البلاد.
*كنت بحلم ببيت..بعزوة وولاد..لكن أخدت نصيبي مترين تراب ورماد.
*أنا أسمي"مكاريوس جاد شاكر"..لو سألتني ليه اتقلت..هقلك مش فاكر.
*لا أنا حرامي..ولا نصاب..ولا عاوز من البلد غير الستر..وأربع حيطان وباب.
*أنا اسمي"مكاريوس"أو كان..ومت برصاص جبان..كنت فاكر الباشا بيهزر..هو معقول هيضرب نار..هو أنا بني أدم ولا فار..أنا مصري يا باشا..بس عيونه كان فيها شرار.
*أنا مصري..ليه تداري عارك بكسري..ياباشا فين العدل؟؟..وليه أنا واخد الظلم حصري.
*أنزل من على الكنيسة ياواد..يا باشا مش وقت الجهاد..ولا عمري هخاف..دانا متربي ع العيش الحاف.
*وفجأة جه الرصاص..ده أنا بصلي يا ناس..طيب يا باشا كنت تستنى لبعد القداس.
*ياااه متألم صحيح..بس شريك في جراحك يا مسيح.
*كنت فرحان وأنا ببني بيتك..دلوقت بس شفتك ورأيتك..
*أقبلني يارب في ملكوتك..وأنت قادر تحمي ولادك وتحمي بيتك.
دانا اسمي مكاريوس..قبطي صعيدي..مصري صعيدي..اهه دمي على أيدي.