الأقباط متحدون | أكتوبر 1997
إغلاق تصغير حمل تطبيق الأقباط متحدون علي أندرويد
ستظهر الصفحة بشكل مختلف لآنك تستخدم نسخة قديمة من متصفح أنترنت أكسبلورر، استخدم نسخة حديثة من انترنت اكسبلورر او أى متصفح أخر مثل فايرفوكس لمشاهدة الصفحة بشكل أفضل.
أخر تحديث ١٩:٤٦ | الأحد ١٧ اكتوبر ٢٠١٠ | ٧ بابة ١٧٢٧ ش | العدد ٢١٧٨ السنة السادسة
الأرشيف
شريط الأخبار
الكاتب
طباعة الصفحة
فهرس الدنيا خيارة
Email This Share to Facebook Share to Twitter Delicious
Digg MySpace Google More...

تقييم الموضوع : ****.
٧٢ أصوات مشاركة فى التقييم

أكتوبر 1997

الأحد ١٧ اكتوبر ٢٠١٠ - ٠٠: ١٢ ص +02:00 CEST
حجم الخط : - +
 

بقلم :مروة رخا
صحيت الصبح على صوت المنبه ... حاولت أفتح عينايا لكن لقيت رموشى لازقة فى بعضها من دموع الليلة اللى فاتت. بعد مجهود فتحت و بصيت للسقف و نفخت. كان نفسى روحى تطلع فى النفخة دى و نخلص ...لكن ما طلعتش!
 زى كل يوم كان لازم أقوم أستحمى و ألبس اللى على الحبل و أحط مكياج يدارى الكآبة و أعمل شعرى و أروح الشغل و اليوم يعدى ... زى ما أيام تانية كتير عدت.
دخلت المكتب و قعدت أنا و الكرسى واحد ... مها سكيرتيرة إدارة المبيعات طلعت العلبة إياها من شنطتها. ريحة البيض المسلوق و الخيار طلعت ... ريحة قميئة ... أووووف! بصيت للسقف و نفخت. كان نفسى روحى تطلع فى النفخة دى كمان و نخلص ... لكن ما طلعتش!
هانت ...
فاضل ساعة و اليوم يتقلب ...
و أنا بـ استعد للمرواح لقيته داخل عليا و بيسألنى عن أحوالى اللى مش عجباه. حكيت له الحكاية المنيلة اللى أنا مش هـ احكيهالكم و اللى مش مهم تعرفوها ... حوارى مع وائل – هنسميه مجازا وائل – فضل متخزن فى عقلى الباطن و فهمته بس اليومين دول.
وائل ابتدى كلامه و سألنى: "أنتى عارفة إنى كنت خاطب؟"
"لأ"
"عارفة إن خطيبتى ماتت فجأة؟"
"إيه دا! .. لأ .. أنا أسفة ... البقية فى حياتك ... أنا مش عارفة أقول إيه؟"
"ماتقوليش حاجة ... هو أنتى ليه لازم تقولى حاجة اصلا؟"
سكت و تنحت و هو كمل كلامه
"كنت فى الشغل ... جالى تليفون ... أبوها قال لى إنها تعبت فجأة ... رحتلهم البيت ... كانت ماتت ... قالوا لى فيرس فى المخ و أمر الله. تانى يوم جيت الشغل و اشتغلت و الناس ابتدوا يعزونى بالكلام إياه و الوش إياه و التعاطف إياه و الدموع إياها ... و أنا مش فاهم هما بيعملوا كدة ليه"
سألته: "يعنى أنت ما كنتش زعلان عليها؟"
"لأ طبعا كنت زعلان و مصدوم ... لكن أنا مش بحب التمثيل و التهويل و قوالب ردود الفعل اللى اترسمت لينا على مر الأيام."
"مش فاهمة حاجة يا وائل"
"إسمعينى يا مروة كويس و فكرى فى كلامى! مين اللى قال إنى لازم أعيط؟ مين اللى قال إنى لازم أخد أجازة من الشغل؟ مين اللى قال إنى لازم أولع سيجارة من سيجارة؟ مين اللى قال إنى لازم أنزل أسكر علشان أنسى؟ مين اللى قال أنى أقلب وشى و أدلدل كتافى و أهيم فى الأرض زى العيل اللى تاه من أمه؟ مين اللى قال إنى لازم انهار و ارقد و استغل الموقف علشان استدر عطف الناس يمكن اطلع بأجازة و لا بفلوس و لا بعروسة جديدة من وفود المعزيات؟"
عقلى ما استوعبش كلامه و سألته تانى: "يعنى أنت فعلا مش زعلان؟"
"أنا زعلت ساعتها و لسه بـ ازعل كل ما أفتكرها لكن اللى أنا عايز أقولهولك يا مروة إن مافيش شكل واحد للحزن ... لما جيهان ماتت الناس كانوا عايزيننى أحزن زى ما هما عايزين مش زى ما أنا حاسس ... فى ناس كتير بتشعر بالغيرة علشان المفروض فى الموقف دا يكونوا غيرانين و ناس بتقلب وشها علشان المفروض تقلب وشها و إلا ما بقاش راجل و لا مابقيتش ست و لا ولا ... هو إحنا يا مروة بنحس فعلا بالمشاعر دى و لا دا الإحساس اللى لازم نحسه فى الموقف دا علشان الصورة تطلع حلوة؟ It is as if we have a moral obligation to suffer"
ابتديت أفهم من بعيد "يعنى إحنا بنمثل على نفسنا؟"
"طبعا ... أخ شاف أخته بتكلم واحد فى الشارع طلع عينها ... ليه؟"
"علشان هو راجل"
"لأ ... علشان هما فهموه إن هو دا الراجل! ما هو ممكن يتكلم معها ... ممكن يسألها .. ممكن يطنش أصلا لأن دا مش شغله ... ممكن يقف معاهم ... ممكن مليون حاجة لكن القالب مكتوب عليه "طلع عينها و إلا هتبقى خــــ"
"بس الحزن مختلف"
"هو هو ... "
"يا وائل إفهمنى أنا حزينة ... سافر ... سابنى ... أنا هضيع من غيره"
"و إيه الفرق بين قبل ما يسيبك و بعد ما سابك؟"
سكت ... سكت كتير
"شوفتى بقى إن مافيش فرق ... هو كان سايبك من قبل ما يسافر و أنتى كنتى مش عايزة تشوفى دا! مافيش حاجة اتغيرت غير إنك اضطريتى تقبلى النهاية."
فعلا ... هو عنده حق
"بس أنا لسة حزينة"
"أنتى حزينة علشان تقدرى تبصى لنفسك فى المرايا و إلا هيبقى ما عندكيش دم و هتبقى علاقتك بيه علاقة طيارى لا لها معنى و لا عمق و هتبقى كل مشاعرك اللى فاتت كدبة و الناس هيقولوا عليكى إيه؟ أنتى حزينة علشان منظرك! إلتزام أخلاقى بالحزن! لازم لما علاقة تنتهى حد يحزن و ينجرح و يتبهدل و حياته تنهار و الا مايبقاش اسمه حب!"
سألته و انا متلخبطة: "يعنى أنت مش مؤمن بالحب"
"إيه اللى جاب سيرة الحب؟"
"حزنى دا"
"هههههههه .. حزنك دا اسمه كبرياء ... اسمه ألم ما بعد الصفعة ... اسمه إزاى فلت من إيدى؟ ... اسمه مين أخد اللعبة بتاعتى!"
"أنا مش طايقة أسمع أكتر من كدة .. أنت ميت من جواك!!!"
رد وائل بهدوء و قال: "أنا مقدر إنك مش عايزة تتعرى قدامى لكن هـ اطلب منك ... بينك و بين نفسك ... كل ما تشعرى بأى حاجة اسألى نفسك لو كنتى فعلا حاسة بالمشاعر دى و لا أنتى لازم تحسيها علشان الناس الطبيعية بتحس بكدة"
مشيت من غير ما افكر حتى فى كلامه ... قفلت عقلى بالضبة و المفتاح ... هيفضل لى إيه أمسك فيه لو جردت كل حاجة من هالة القدسية اللى حواليها ... بنيانى النفسى مش هيستحمل ... قفلت عقلى.
و مها فضلت كل يوم بتاكل بيض مسلوق و خيار!
ديسمبر 2009
كلام وائل طلع صح! مش بس فى المشاعر و العواطف .. لأ .. فى اختياراتنا و قراراتنا ... عملت بنصيحته و اتجرأت اسأل نفسى و اسأل قرائى : مين اللى قال؟
1.    انك لازم تدخل جامعة بعد ثانوية عامة؟
2.    انك لازم تشتغل بمؤهلك؟
3.    انك لازم تتجوز بعد ما تتخرج؟
4.    انك لازم تخلف لما تتجوز؟
5.    انك لازم تخلف ولد؟
6.    انك لو اتجوزت واحدة خام عمرها ما هتخونك؟
7.    انها لو عذراء تبقى شريفة؟
8.    انها لو لطشتك بالقلم لما حاولت تبوسها تبقى عمرها ما باست حد قبلك؟
9.    انك لو عرفت 100 ست قبل الجواز هتبقى جامد يا حامد؟
10.    انك لو حامد الجامد مراتك برده مش هتخونك؟
11.    انك ما ينفعش تتجوز واحدة اكبر منك؟
12.    انك تتسلى بالمطلقة آه .. تتجوزها لأ؟
13.    انك تصاحب على مراتك أه .. تتجوز عليها لأ؟
14.    انك تصاحب كل يوم واحدة آه .. لكن اختك لأ؟
15.    انك تهزر مع زميلاتك فى الشغل و يهزروا معاك آه .. لكن مراتك لأ؟
16.    انك مش مهم تستحمى و تغسل سنانك و تحط ديودورانت – لأنك راجل؟
17.    انك متجوز بقرة بتسحبها على الحظيرة فى أى وقت؟
18.    انك لما تحكى عن مغامراتك بالاسم و السن و العنوان تبقى راجل أصلا؟
19.    انك من حقك تضرب اختك و لا صاحبتك و لا خطيبتك و لا مراتك و لا اى حد من ولادك؟
20.    انك اتخلقت علشان تاكل و تشرب و تتزواج و تتكاثر؟

مين اللى قال؟

1.    انِك لازم تتجوزى أول ما تتخرجى؟
2.    انِك لازم تلحقى نفسك قبل ال25؟
3.    انِك بعد ال30 لازم ترضى بأى ذكر و السلام؟
4.    انِك نكرة و فاشلة من غير زوج؟
5.    انِك عمرك ما هتلاقى حد يحبك زى ما انتى فـ لازم تمثلى؟
6.    انِك بتشتغلى بس علشان تصطادى عريس؟
7.    انِك ما ينفعش تتجوزى راجل متجوز – أيوة تبقى زوجة تانية يعنى؟
8.    انِك ما ينفعش تسافرى و تعيشى برة – أيوة من غير راجل؟
9.    انِك ما ينفعش تستقلى بحياتك بعيد عن أهلك – أيوة من غير ما تتجوزى؟
10.    انِك لو مديرك بيعاكسك أو بيتحرش بيكى لازم تسكتى علشان سمعتك؟
11.    انِك لو كلب فى الشارع "هاو هاو" عليكى مش من حقك تحدفيه بطوبة؟
12.    انِك مش ممكن تدرسى أى حاجة فى أى سن فى أى وقت؟
13.    انِك مش من حقك تغلطى ... احنا اتخلقنا علشان نغلط و نتعلم من أخطائنا؟
14.    انِك مش من حقك ترفضى الزواج لو مش حلمك؟
15.    انِك مش من حقك ترفضى الأمومة لو مش حساها؟
16.    انِك لازم تدفعى ثمن اختيار غلط بقية عمرك؟
17.    انِك لازم تعيشى و تموتى قاصر مهما كبرتى سنا و مركزا؟
18.    انِك شئ فى عهدة أب أو شئ فى خزنة زوج؟
19.    انِك ما ينفعش تقولى لأ .. لأ على أى حاجة مش عايزاها ... لأ مش هـ البس كذا ... لأ مش هـ اقلع كذا ... لأ مش هـ اروح هنا ... لأ مش هـ اقعد هناك ... لأ مش هـ اسيب فلان ... لأ مش هـ اتجوز علان ... لأ مش هـ اقبل الإهانة دى ... لأ مش هـ اقبل التحكم دا ... لأ ... ؟
20.    مين اللى قالكم تعيشوا زى الأموات الأحياء ... زى الزومبى ... يا بدون روح ... يا بدون عقل ... يا بدون قلب .. يا بدون هدف!




كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها



تابعونا على صفحتنا علي الفيسبوك
تقييم الموضوع :
 
تعليقات القراء


43- I like it
Mrs. Mostafa email | ٩ يناير ٢٠١١ - ٥٩: ٠٧: ١١
٠  
I like ur method in expressing our deep emotions which we r not able to express in public
42- اي نوع من الغلط الي بنتعلم منه
مصطفي عبد المطلب email | ١٢ ديسمبر ٢٠١٠ - ٠١: ٢٥: ٢٢
٢-  
بالنسبة للبنات في غلطات مش ينفع تغلطها عشان تتعلم منها
زي الزنا مثلا دي مش غلطة دي ذنب محرم
حاولي تربطي افكاري بالدين بحيث ما تتعارضش معاه وتسقطي في نظر نفسك وفي نظر ناس هتتبع كلامك وتبقي سبب انهم يسقطوا في نظر نفسهم لو ادوا حرية لنفسهم بالمساحة الي انت بتعرضيها عليهم
حاولي تفكري في الكلام اكتر قبل ما تقوليه عشان انت مش بكلمي نفسك ومش خاصة لاء الكلام ده في ناس بتاخده وتتبعه وربنا يوفقك
41- I\\
Yu Yu email | ٢٣ نوفمبر ٢٠١٠ - ٢٤: ١٤: ١٦
٠  
ده كلام لازم يتنقل و يتنشر عشان ده رأى نسبة كبيرة من البنات
40- صح أوى
بسنت القفاش email | ١٥ نوفمبر ٢٠١٠ - ٠٢: ٣٩: ١٢
٠   ٠
الحوار اللى دار بينك وبين وائل بيدر بينى وبين نفسى كتير وفعلا انا مقتنعة بكده مش لازم خالص نحط نفسنا فى قوالب ولا نكون او نتصرف زى ما اللى حوالينا عايزين او زى ما المفروض نكون ومين اللى قال او قرر المفروض ده اصلا
39- كلمة قدتكون دون معنى
النسر الذهبي email | ٣ نوفمبر ٢٠١٠ - ٥٧: ٢٠: ٢٣
٠  
ايتها الغالية مروة نحن بني يعرب لنا في الحياة تقاليد واعراف وقوانين سنها رجل لحماية الرجال في كل الأدوار العربية نقشت في كل الأزقة والشوارع والحارات الواسعة والدروب الضيقة التي تسير بها كل النساء العربيات يقرأن ما كتب وتنقش كل كلمة في ذواكرهن وتنقل من جيل الى جيل تتخمر بها نساء العرب تتدرس في مدارس العرب وتصفق لها كل ايدي رجالات العرب
ودائما ننسى ان لولا المرأة لما وجد الرجل
فيا عزيزتي لنحارب ادمغة النساء المتحجرة لكي نصل الى مانريد عندها نستطيع ان نلبس ما نريد ونتزوج متى نريد او ان نبقى بدون زواج ايضا كما نريد والاهم ان نتكلم ويسمع الكل ما نقول
ودمتي
38- مروة رخا
Waleed email | ١ نوفمبر ٢٠١٠ - ٢٣: ٢٢: ٢٠
٠   ٠
اعتقد ان ملخص الكلام و الهدف منة ان اى انسان سواء كان رجل او ست يكون نفسة مش اكتر و تكون قرارتة نابعة من جواه و من دماغة و بعد تفكير مهما كانت هذة القرارات دى تقليدية و عادى جدا
من الاخر الانسان ميكونش امعة ان احسن الناس احسن و انت اسئؤ اساء
37- امل جديد
lilydona email | ١ نوفمبر ٢٠١٠ - ١٧: ١٣: ٠١
٠   ٠
انتي بجد ايديتيني امل جديد ودفعه قوية
لاني فعلا محتجاها ةكنت محبطة نوعا ما الفترة دي علشان ظروف معينة في حياتي
وعلشان حاسه كل حاجه مقفوله في وشي
وكل ما تتقفل اكتر كل ما الافكار السلبيه تسيطر عليا لغاية ما افقد ثقتي بنفسي وافقد املي بالحياه
36- الله عليكي يا استأذه
إيمان email | ٣١ اكتوبر ٢٠١٠ - ٠٠: ٠١: ٠٩
٠   ٠
بجد كلام جميل جداً وفعلا احنا دايماً نتخد كل قرارتنا علشان المفروض اننا نعمل كده واللى الناس كلها بتعمله لكن لو فكرت غير كده احس انى غلط وانى مش طبيعى لان الناس كلها بتعمل كده وانا لأ .. ياريت كل واحد فينا يغير تفكيره التقليدى ده ويفكر يكون غير اى حد ومش معنى كده انه غلط بالعكس لو فكر شويه هيلاقى انه مش بيعمل اى حاجه غلط.. كلامك جميل يا مروه
35- روعه
بوسى email | ٣٠ اكتوبر ٢٠١٠ - ٢٢: ٠١: ١٩
٠   ٠
بجد يا مروه مقالتك جميله جدا وكلام وائل عاقل جدا وبجد فى كلام كتير عجبنى وفعلا ليه لازم كل حاجه ناخده روتينى كده
34- تعليق
moheb email | ٢٥ اكتوبر ٢٠١٠ - ٠٩: ٣٢: ١١
٠   ٠
المقال فعلا جميل فيما عدا العنوان وحرف الخاء الذي ورد مفردا في وصف من لا يطلع عين اخته بصراحه لم اكن اتوقعهم من كاتبه تحاول ان تحدث تغييرا في المجتمع وتستخدم نفس الكلمات الغير لائقه التي يستخدمها من تريد تغييرهم
وبالنسبه لكاتبه التعليق رقم ٨ فانا لااجد تعارض بين المقال وبين ما تقوله من اننا بشر ولنا احساس
فكاتبه المقال تقول اننا لا يجب ان نمثل حتي نظهر احساسنا ولكن لنتصرف بحسب طبيعتنا وليكن لكل واحد منا لونه الذي يعبر به بصدق عما في نفسه من حزن او فرح دون ان يقلد غيره اي لاتكون هناك قوالب جامده للتعبير عن مشاعرنا ان لم نجاريها نكون من وجهه نظر اصحاب تلك القوالب متبلدين لا مشاعر لنا 
33- انت او انتى عايز ايه؟؟؟ اعمله
نرسيس email | ٢٥ اكتوبر ٢٠١٠ - ٠٨: ٠٦: ٠١
٠   ٠
حقيقى يا مروه انا معجبه بتفكيرك اوى . لازم كل واحد ياخد ورقه المقال الجميل ده ويعتبره ورقه اسئله لامتحان ذاته لان الاسئله دى لكل بنت او ولد هيقيم تفكيره ايه. وهل يهتم بنظره المجتمع له يعنى هو عايز يعمل كده لانه المفروض يعمل ده ولا بيعمله لانه حابب ده ويسال نفسه ويقعد يجاوب عليها . هيلاقى نفسه انه ماشى تبع القطيع مثل قطيع الغنم نحن شعب لا يفكر ويخاف التغيير لان اللى نعرفه احسن ولاننا لو اختلفنا عن غيرنا هنلاقى نظرات الاستهجان من المجتمع نفسه والذى يطلق عليه المجتمع الشرقى الذى يحكم هذه الاعراف والقوانين انه لازم نعمل كده ولازم نمشى زى ما الناس كلها بتعمل وحقيقى هتمعى كلام مش حلو زى اللى سمعته لما حبيت استقل بذاتى واعيش فى شقه لوحدى من غير زواج احنا مجتمع بنخاف الناس يبصوا لنا نظره خطأ لكن ان احنا نعمل اللى احنا بنحبه لا كده غلط لا كده عيب مايصحش وهكذا . اخيرا وليس اخرا اشكرك على مقالك الجميل اللى خلانا نشغل عقولنا ويصحى فينا كلمه انت عايز ايه واللى انت حاسسه اعمله
32- تعليق على مين الى قال
رباب email | ١٩ اكتوبر ٢٠١٠ - ٠٧: ٠٧: ١٨
٠   ٠
مروه انتى بتقولى كلام كتيير انا حساه وشعره بيه بس ياريت الناس تفهم الى بيقروا الكلام ده يا مروه قله قليله جدا انما الاغلبيه عايشه فى الارف نفسى فى مسلسل يتعمل يفهم الناس ويقولهوم كده
31- i like
maha email | ١٩ اكتوبر ٢٠١٠ - ١١: ٥٦: ١٦
٠   ٠
الناس بتحب المعاناة بدل متلوم نفسها.ذي يا بخت من بات مظلوم و لا بات ظالم محدش و هو بيتألم بيحب يفكر انا عملت ايه غلط.المهمانك تعترف بسوء اختياراك و عماك و تسامح نفسك و تكمل حياتك من غير لا تعاقب ولا تدمر نفسك........
30- انا كدة
mero email | ١٩ اكتوبر ٢٠١٠ - ١٨: ١٩: ١٤
٠   ٠
الله عليكي يا مروه بجد كانك جيتي على كل حد فينا ولمستي نقطة ضعفه اللي بيحاول يخبيها ومش عاوز يواجه نفسه بيها وانا زي وائل دايما بحسبها كده لكن الناس دايما بتفكرني اني مش عندي قلب ولا مشاعر واني جامدة يعني قاسية
29- ومع الالتزام الكامل ببروتوكول التعليق
أنا email | ١٩ اكتوبر ٢٠١٠ - ١٧: ١٩: ١٢
٠   ٠
أرجو من الرائعة مروة رخا تفسير هذه هذه القطعة
ممكن مليون حاجة لكن القالب مكتوب عليه \\\\\\\"طلع عينها و إلا هتبقى خــــ\\\\\\\"ـ
وتحديدا معنى (((\\\\\\\"و إلا هتبقى خــــ\\\\\\\")))
مع خالص التحيات والإحـــــــــــــتـــــــــــــرام
28- برافو
شيماء الجمال email | ١٩ اكتوبر ٢٠١٠ - ١٨: ٢٩: ٠٤
٠   ٠
مقال جميل يا مروة :)
27- برافوو وائل
Nany El-Afify email | ١٨ اكتوبر ٢٠١٠ - ١٠: ٤٣: ٢١
٠   ٠
بجد يا مروة الجزء دة عجبنى اووووووووووي وخلاني افكر تانى واعيد حسباتي في حاجات كتير اووووى
وكلام وائل بجد منطقى جدا واقنعني بصراحة لأني برضو اول ما قريته اديت نفس رد الفعل بتاعك بس بعد كدة استوعبته وهو معاه حق بصراحة مافيش احسن من ان الانسان يبقى على طبيعته على الاقل احساسه هيبقى صادق وطالع من قلبه
كفايا تمثيل بقى احنا بقينا نعيش فى الدور اوووي ولا نجوم السنيما
26- كلام حقيقي جدا
بسمه امل email | ١٨ اكتوبر ٢٠١٠ - ٣٣: ٥٩: ١٥
٠   ٠
هذا المقال رااااااائع جدا وجميل جدا
وكلام فعلا ترك في قلبي بصمه
لان عمري ما فكرت فيه او خطر على بالي
انتي خليتيني افكر باشياء كثيره اعملها عشان الناس ويا ريت وهم يستاهلو لاكن ما يستاهلو
شكرا لكي
محبتك بسمه امل
25- ya gamed
samir ames email | ١٨ اكتوبر ٢٠١٠ - ٢٦: ٣٩: ٠٦
٠   ٠
المقال ده جامد قوي المعقول أحسن الجرعه الزياده تضر واحيانا تميت جميل أنك تقلدي الكاتب العبقري الأستاذ أنيس منصور مع تحيات سمير اميس
24- ???
son son email | ١٨ اكتوبر ٢٠١٠ - ٣٤: ٥٤: ٠٤
٠   ٠
رد الإدارة : تم وشكرا للتنويه
23- الدنيا خيارة
sherrymaher email | ١٨ اكتوبر ٢٠١٠ - ٢٠: ٥٣: ٠٣
٠   ٠
:)) رائع رائع رائع
جريئة و جميلة و واضحة و صادقة أوي
بالتوفيق يا ميرو يا جميلة :))
22- the power
روز email | ١٨ اكتوبر ٢٠١٠ - ٤١: ٢٦: ٠١
٠   ٠
اشكرك يا مها ع مقالتك . بعد ما قريتها حاسه اني بالقوة حاسه اني دلوقت عايزة اكسر الكمبيوتر و اقول لا مش عارفه ليه
بس حقيقي مقالتك حلوة قوي
21- creative as usual
princess miro email | ١٧ اكتوبر ٢٠١٠ - ٥٧: ٣٢: ٢٢
٠   ٠
you did performed it very well . it is so real .your Words are very simple & close they can easily reach to the heart asif i was there . thanks
20- مها لااااااااااااااااااا
ryhooma email | ١٧ اكتوبر ٢٠١٠ - ٣٩: ٥٣: ٢١
٠   ٠
اولا انا لسة قاعدة مع مها وعلى فكرة هي لسة بتاكل البيض كل يوم الصبح
وموافقة على 90 % من الاعتراضات واكتشفت دلوقتي لما قريتها ان الواحد لما يعمل الحاجات دي ويعيش بالطريقة دي يبقى زي اللي بيحارب طواحين الهوا بيكون مقتنع اوي باللب هو بيعمله بس الناس شايفاه حد كل حاجة فيه غريبة وماتنسيش اني لسه عايشة مع مها من سنة 1997 بس ولببه العظيم بقاوم افكار مها وبيبضها بكل قوة
المشكلة ان كل اللي ف حياتي مها والكترة تغلب الشجاعة انا بقوم من النوم كل يوم الصبح ابص ف المراية واشوف بقيت شبه مها والا لسة
ربنا يستر
19- روووووووووووووووووووعه
mahitab email | ١٧ اكتوبر ٢٠١٠ - ٤٠: ٤٨: ٢١
٠   ٠
ميرو مش هقولك حلو وجامد ومحصلش وفظيع وكل الكلام اللي هو اصلا موجوده ف المقال
بس هقولك انه واقعي مليون ف الميه انا شخصيا قعدت سالت نفسي الاسئله د ملقيتش ولا اجابه منطقيه غير التعود العادات التقاليد الاصول الحاجات اللي احنا برضو مش فاهمين هي اصلها ايه او جت لنا منين
استمري ياجميله وف انتظار باقي الحلقات علي احر من الجمر
18- يعني ايه؟؟
أنا email | ١٧ اكتوبر ٢٠١٠ - ٥١: ٤٢: ٢١
٠   ٠
رد الإدارة : يرجى الالتزام ببروتوكول نشر التعليقات
17- جامدة جدااا
sally ahmed email | ١٧ اكتوبر ٢٠١٠ - ٠٥: ٢٤: ٢٠
٠   ٠
انتي بجد جامدة جدا وكلامك واقعي جدا فعلا احنا بنعمل حاجات كتير اوي علشان متعودين عليها وفي حاجات كتير بنقول عليها غلط وعيب من غير ما نعرف ليه!!
16- جميل
basma bahaa email | ١٧ اكتوبر ٢٠١٠ - ٤٣: ٠٠: ٢٠
٠   ٠
برافو يا مروة بجد..وربنا يريح قلبك..ولو ان الفراق له المه الخاص بيه مش تمثيل يعنى!
15- ممكن استعير وائل
ايهاب الهادى email | ١٧ اكتوبر ٢٠١٠ - ٤٣: ٥٣: ١٦
٠   ٠
ممكن استعير وائل يجاوب على اﻻسئلة اللى سألونى عنها ومش عارف ارد

ليه لما بطارية الريموت كنترول تبقى ضعيفة ندوس على اﻻزرار بتاعة الريموت بشدة ؟
ليه لما تكون مجموعة واقفة فى انتظار اﻻسانسير ويطب عليهم واحد يروح يضغط على الزر علشان يستدعى اﻻسانسير رغم ان اللمبة منورة والناس طالباه ؟
وليه لما اﻻسانسير يتأخر نضغط على الزر عدة مرات ؟
ليه لما نعمل فيش وتشبيه نمسح صوابعنا على الحائط ؟
ليه فى اى تجمع بشرى لما نسمع رنة موبايل كل واحد يطلع الحتة اللى معاه ويبص فيها ؟
وسؤال محيرنى شخصيا ليه اﻻم تفتح فمها على اتساعة لما تيجى تأكل صغيرها ؟
بالتاكيد هناك اشياء نفعلها بدون تفكير او تحليل منطقى لكننا نفعلها وهذا ﻻ يجعلنا سيئين وﻻ نحتاج لتعقيد اﻻمور فى البحث عن اجابة للسؤال ليه فهناك بجوار العقل احاسيس وعواطف ومشاعر نقبل ان تحركنا احيانا
ويا ستى كبريها شويه ومتخليهاش خيارة
14- اتغير بقى
بيجو email | ١٧ اكتوبر ٢٠١٠ - ١٩: ٤٣: ١٥
٠   ٠
نداء للمجتمع وللأفكار العتيقة المعششة في الأذهان امتى هتتغيري؟؟؟
بحيي كتابك واسئلتك وشخصك
13- انا لما عرفتك حبيتك اووووووي
منى email | ١٧ اكتوبر ٢٠١٠ - ١٣: ٣٠: ١٥
٠   ٠
السلام عليكم ورحمة الله وبركاته
الفترة دي من حياتي حصلي حاحات كتير فمهت حاجات كتير منها عرفت انا عوزة ايه ؟؟ في بعض امور حياتي
وسمعت في برنامج ليكي حكاية الجزر والبيضة والنسكافية وعوزة اقولك انا ما بين البيضة والنسكافية بس ان شاء الله انا هروح للنسكافية لاني حبه اني اكون كده
انا معاكي في حاجات كتير يعني انا لو حصل عزاء او مشكلة مادام انا ماليش اهمية هروح الشغل او لو كان عندي كروس هروح وهكمل حياتي مادام عارفة اقف علي رجلي الحمد لله ولله الفضل هقف عمل وهعيش حياتي كما يجب وكما الحاجات الممنوعة المرفوضة انا بحاول امشي ما يرضي الله لان ربنا خلقنا وعارف الكتالوج بتعنا يعني لما يحرم علينا حاجة هو عارف انها غلط علينا وانها مضره بينا .
وشكرا ليكي ولكل نصائحك في الحياة .... وانا تعلمت ان الوحيد اللي يستحق الحب في الاول والاخر هو الله \\\"ان الخيرة للعبد فيما اختار له ربه, فإنه اعلم به منه, وأرحم به من امه التى ولدته, فما للعبد إلا أن يرضى بحكم ربه, ويفوض الأمر إليه, ويكتفى بكفاية ربه وخالقه ومولاه\\\"
وبعدها نفسي وايه حاجة تيجي بعد كده
وشكرا ليكي
12- وائل دا استاذ
godi email | ١٧ اكتوبر ٢٠١٠ - ١١: ١٦: ١٥
٠  
عارفه يا مروه وانا بقرأ المقال مت من الدحك مش عشان المقال فيه حاجه بس عشان جاوب علي حاجه كانت هتجنني من مده لدرجه اني شكيت في نفسي انا ليه لما موضوع ارتباطي باظ محصليش زي صحابي وخسيت النص ومشيت ف الشوراع وشكلي اتدمر قولت اكيد انا مش طبيعيه دا كل اللي بيفركش لازم يبقي شكله كده بس الحمد لله طلعت طبيعيه برافوا يا ميرو مقال جامد جدا واحلي ما فيه انه فعلا واقعي جدا جدا
11- catherine
catherine email | ١٧ اكتوبر ٢٠١٠ - ٠٤: ٢٨: ١٣
٠   ٠
يعني انتي عايزه تقولي أن لما يموت حد ..حتي لو احنا موش زعلانين عليه ...ما نرقعش بالصوت ..واحنا بنفتح الشباك ... ؟ ما نشقش هدومنا ؟ ما نلطمش ؟ ما نولولش ؟ ما نرميش نفسنا في الأرض ونتمرغ في التراب ؟ امال ازاي الناس تعرف اننا حزاني ؟ هو حقيقي الحزن في القلب .. لكن احنا لازم نحزن بالطريقه اللي ترضي الناس ... لا يا مروه انتي عايزه الناس تاكل وشنا ... وبعدين اذا كان الجيران نفسهم اللي كانوا منتظرين موت المرحوم بفارغ الصبر ... ..هييجوا يجروا أول ما يسمعوا الخبر متشحون بالسواد ... والدموع بله هدومهم ... وقبل ما يوصلوا العزاء ..هنعرف بوصولهم من أول الشارع ...لما نسمع الصوت الحياني بيصرخ . و يقول يا لهوي ...يالهوي !!!!
10- راى
واحد email | ١٧ اكتوبر ٢٠١٠ - ١٠: ١٢: ١٣
٠  
على فكرة مش ملاحظة ان كلمة الدنيا خيارة مبتذلة
9- شكرا
شكرا email | ١٧ اكتوبر ٢٠١٠ - ٥٨: ٥٥: ١٢
٠   ٠
شكرا على جرائتك فى تناول الموضوع ، كذلك الذكاء فى تحليل عوامل نفسيه فى تصرفات تبدو عاديه
8- لضعفاتنا ردود فعل
مارى خليل email | ١٧ اكتوبر ٢٠١٠ - ٣٥: ٤٨: ١١
٠   ٠
يا مروة نحن بشر ولنا احاسيس فمثلا عند موت جار لنا مش هاقولك قريب او زوج او اى احد يكون بمثابة حصن لنا انا هاقولك على احساسى ....مات جار لنا وهو مسلم صدقينى حزنت علية حزنا شديدا وكلما وقفت ببلكونتنا اتزكرة وارى فية كل من يشابههة لانة كان انسان محترم ووقور لاتقولى لية انا حزنت علية فهذة مشاعر لايمكن ان تدخل فيها اى تمثيل
اقول لكى ايضا يوم وفاة ابى رايت الدنيا تنقلب بداخلى اردت ان يخلص العالم وتكون الاخرة ولا اريد طلوع للشمس وعند دخول ابى القبر احسست بقلبى هو الزى يوضع بالقبر رجعت البيت ومعى الكل
لم ارى احد الناس كلها لاوجود لها بالرغم من وجودهم واقول لك ان هذا اليوم محفور بزاكرتى وقلبى
اما مشاعر الانثى بالزواج بعد التخرج فاقول كتر خير البنات الاتى يصبرن للتخرج هههههههه
فصدقينى معظم بناتنا يردن الزواج قبل واثناء الدراسة الاعدادية
واخيرا اقول ان لكل انسان مشاعر واحاسيس وقلب وعقل يفكر وزكريات تسكن بافكارة
ولا تسالى لية ولية
7- جميل جداً
Dany email | ١٧ اكتوبر ٢٠١٠ - ١٢: ١٩: ٠٦
٠   ٠
الرب يباركك ويبارك تعب محبتك
6- مقال معـدى
خالد مسلم email | ١٧ اكتوبر ٢٠١٠ - ٠٩: ٤٥: ٠٣
٠   ٠
سؤال للكاتبة
هوة لازم المقال ده يعجبنى وأقول حلو.. أو مايعجبنيش وأقول وحش؟
موش ممكن أقول اللى ف نفسى؟
يعنى موش ممكن أقولك :إنى كنت معدى بالصدفة وقريته .. لإنى كنت بإحمل ملف من النت؟
يعنى ..على مالملف أنهى التحميـــــــل.. كنت قريت المقــــــــال.
طبعاً موش هاطالبك بالإجابة
علشان ماكونش أنا ووائل عليكى
.......
الحمد لله
الملف إنتهى من التحميل .. أشوفك فى ظروف أحسن من كده
إلطف يارب بعبيدك..
(الطماطم) المختفية من السوق دى
طلع سرها باتــــع
5- بامانه وائل استاذ واستنتاجاتك رائعه
مايكل جودة email | ١٧ اكتوبر ٢٠١٠ - ٣٥: ٢٨: ٠١
٠   ٠
مقالتك رائعه جدا متميزة .. جدا
بجد فيها فايدة .. وحطت جوايا اسئلة اكتر
شكرا ليكي
4- مقال رائع
العبيط email | ١٧ اكتوبر ٢٠١٠ - ١٧: ٣١: ٠٠
٠   ٠
حقيقي مقال رائع لولا بعض التلميحات اللي كان ممكن تستغني عنها و تعبري عن نفس المعنى بس باسلوب ارقى
بس مش كان أفضل لو تزوري الدكتور الرخاوي أحسن
3- مش قادر
اعتذار للكاتبه email | ١٦ اكتوبر ٢٠١٠ - ٥٠: ٣٥: ٢٣
٠   ٠
مش قادر اكمل سطرين من مقالك واشعر ان ناقصك كتير ياريت تقرى ل محمود السعدنى او احمد رجب .وممكن وضع صورتك على المقال هو السبب لاننا ماتعودناش النوعيه دى من الكتابه تطلع من بنوته حلوه .على فكره انا ماليش فى امعاكسه ووالهى ماعكست فى حياتى وانا شباب .
2- جميل
Emo email | ١٦ اكتوبر ٢٠١٠ - ٣٦: ٣٣: ٢٣
٠   ٠
موضوع متناسق وجميل.الى الامام .بس...انا علشان اقول رأيي لازم اقرا ليكي كتير
لكن على العموم اسلوبك شيق جدا
1- أفكار عظيمة جداً
مجدي منصور برسوم email | ١٦ اكتوبر ٢٠١٠ - ٠٩: ٢٧: ٢٣
٠   ٠
أفكار عظيمة جداً تذكرني بروايات الكاتب العظيم مصطفى لطفي المنفلوطي، و روايات الكاتب الروسي ليو تولستوي، وأيضاً تذكرني بأشعار شاعر الهند العظيم طاغور.
أضف تعليق
الاسم:
البريد الألكترونى: (إختيارى)
عنوان التعليق:
نص التعليق:
ارسال
  * تستطيع الكتابة بالحروف الأنجليزية كلمات عربية داخل نص التعليق ثم تختار المعنى المطلب من القائمة التى تظهر لك، مثل alaqbat = الأقباط وهكذا .. ، وتستطيع غلق هذه الخدمة بالنقر على "on" لتصبح "off" أسفل نص التعليق على الشمال.