كتب – محرر الأقباط متحدون
قالت الصحفية أماني موسى، تعليقًا على بيان الداعية معز مسعود بزواجه من الفنانة شيري عادل، والذي لاقى انتقادات واسعة، "الناس اللي زعلانة أوي من معز مسعود وحاسين أنه بيتاجر بالدين وبوظ يا عيني عقول أجيال وشوّه نفسياتهم هو ومَن على شاكلته، وعمالين يحاكموه ويتهموه.. الاتهام الحقيقي موجه للي سمح لمعز وغيره كتير يطلعوا يلعبوا في دماغ الشعب اللي معظمه جاهل قراية وكتابة".
واستطردت في تدوينة عبر حسابها بالفيسبوك، الاتهام موجه للي فتح ليهم الشاشات والنوادي والاجتماعات والسوشيال ميديا.
اللي ساب لهم ساحات الإعلام كلها الليل قبل النهار، يطلعوا يعملوا ويقولوا اللي عايزينه.
واستنكرت ما يقدمه الإعلام المصري من كم لا حصر له من برامج التوك شو والبرامج الدينية، مع غياب كامل وتام لوجود برامج تبث أفلام وثائقية، قائلة: "بلد بحجم مصر مفيهاش برنامج واحد وحيد يوحد ربنا بيقدم أفلام وثائقية... كله بس يطلع يهري ويحكي في المحكي ويرط في سيرة الناس دة اتجوز، دة طلق، دة بيحب، أو يحكي في أمور جوهرية لتقدم الشعوب زي الناس تلبس إيه ومتلبسش وتاكل إيه ومتاكلش إيه وتدخل أدبي ولا علمي وتتجوز حسين ولا حسن.الجزيرة اللي معترضين عليها بتعرف تعمل أفلام وثائقية في كل المجالات ومصر بتعمل إعلام المهلبية بالقشطة.
