9 نصائح مهمة قبل ما تشتري لحمة العيد

العيد فرحة ولمة عيلة وإحساس بالغير وده اللي بنحسه في العيد الكبير، اللي فيه ناس بتدبح فيه وناس تانية بتحب تشتري لحمة جاهزة، فحبينا نوفر تعب أنك تشتري لحمة وتطلع مش كويسة.

دي شوية نصائح مهمة هتخليك تختار أحلى لحمة من أسواق القاهرة.
أول حاجة لازم تاخدوا بالكم منها بحسب اللي نشره مؤخرًا موقع مصراوي هي أن لون اللحمة أكتر حاجة بتبين جودتها، فلازم يبقى لونها وردى.

ثاني حاجة لما تشتري اللحم البقري لازم يبقى لون اللحم أحمر غامق وليه رائحة طازجة.

ثالث حاجة لازم تتأكدوا منها أن اللحوم موجودة جوه الثلاجة ومش مكشوفة أو معرضة للهواء.

رابع حاجة نسيج اللحم لازم يكون صلب ولون الدهون مايلة للون الأصفر.


خامس حاجة خلوا بالكم لما يكون بين اللحم والدهن،  فيه غضاريف ده دليل على كبر سن الحيوان.

سادس حاجة لازم اللحوم تبقى مافيهاش بقع زرقاء في المناطق اللي بيكون فيها عظام.

سابع حاجة خلوا بالكم منها أن اللحم البتلو أحسن أنواع اللحوم، لأنه أكتر حاجة بتتهضم بسرعة، وفيها نسبة قليلة من الدهون والكوليسترول.

ثامن حاجة يفضل لو تشتري لحم الرقبة “الدوش” علشان تعملوا فتة العيد.

تاسع حاجة بقى لازم تشتري اللحمة من جزار موثوق أو سوبر ماركت أنت واثق فيه كويس.


وكل سنة وأنتم طبين ومتهنين بلمة العيلة!