ميرهان حسن تُشيد بـ"جدل" مسلسلها الجديد: ندفع ثمن ما يفعله المخرجون والمنتجون

 

وقالت "ميرهان" عبر صفحتها الشخصية على تبادل الصور الشهير "إنستجرام"، معلقةً على صورة لها من المسلسل: "الحمد لله مبسوطة أوي بالجدل اللي حاصل حول شخصية رغدة الشخصية اللي بلعبها في مسلسل أيوب.. الجدل ده في حد ذاته نجاح.. أنا استنيت دور زي ده يتعرض عليا كتير". 

 

وأضافت: "للأسف معظم المنتجين والمخرجين مابيحبوش يغامروا وبيفضلوا يستسهلوا ويكرروا نفس الممثلين والممثلات في نفس الأدوار وإحنا اللي بندفع الثمن تكرار الشخصيات عشان نتواجد.. فالحمد لله إن جاتلي الفرصة ألعب شخصية كنت بتمنى ألعبها لأني بحب الأدوار المركبة اللي بتعيش صراع داخلي لأن ده إنساني وحقيقي أكتر من الأدوار اللي بتكون فيها الشخصية خيرة على طول الخط أو شريرة على طول الخط، الحياة أعمق من كده ومليانة قصص أقسى من اللي بنقدمها في الدراما.. وزي ما في ناس جدعة في ناس ندلة أوي وفي ناس بتحسبها غلط وكل شخص بيحسبها بطريقته، وكتير بيتخلوا عن أخلاقهم ومبادئهم وأقرب الناس ليهم حتى بيتخلوا عن نفسهم بسبب الخوف.. الخوف من الفقر الخوف من الحوجة الخوف من الدنيا.. دي نماذج موجودة وحقيقية.. هدفنا نقدمها لكم زي ما هي بخطأها وصوابها وتصدقوها.. لما تصدقوها يبقا نجحنا". 

 

مسلسل "أيوب" بطولة مصطفى شعبان، أيتن عامر، ميرهان حسن، محمد لطفي، دياب، هنا الزهد، وآخرين، وإخراج أحمد صالح، وتأليف محمد سيد بشير، وإنتاج تامر مرسى.

 

وتدور أحداث المسلسل، حول شاب بسيط لم يكمل تعليمه بسبب ظروفه المادية، يقع ضحية عدد من الأقارب والأصدقاء عندما يقوموا بسجنه بسبب الديون المتراكمة عليه، وهو ما جعل والدته تحزن عليه وتتوفى، وهو ما يجعل تفكيره يتغير تمامًا، ويصبح همه الوحيد عقب الخروج من السجن هو الانتقام ممن تسبب في سجنه ووفاة والدته.