عبد الفتاح: أكبر خطأ ترتكبه حكومات مصر المتتالية أنها تهتم بالحجر ولا تهتم بالبشر

عدّد الدكتور معتز عبد الفتاح، أستاذ العلوم السياسية بجامعة القاهرة، أنواع لما أسماه بـ«المواطن المُتعب»، واصفًا إياه بـ«نوع  من المواطنين مطلعين عين نفسهم وعينا معاهم».

 

أضاف عبد الفتاح، خلال تقديمه برنامج «حلقة الوصل»، عبر فضائية «أون لايف»، اليوم الاثنين، أن «النوع الأول يضع أمواله في شركات توظيف أموال، ثم يتعرض للنصب،  فيقول الحكومة معملتش اللي عليها».
 

واصل: «النوع الثاني مواطن بياكل سندوتش لحمة ملهوش مصدر فيجيله أمراض ويشتم في الحكومة، والنوع الثالث مواطن مش معاه ويتجوز ويخلف ويقول الحقينا يا حكومة، والرابع مواطن يهاجر هجرة غير شرعية، مع علمه بارتفاع نسبة موته، بسبب غباء وجشع ولا وعي، وبعدين المركب تغرق فيقولوا البلد هي السبب».

 

تابع: «النوع الخامس مواطنين عملوا ثورتين، و100 جمعة تظاهر، وقطع طرق وبتاع، وبعدين يلطموا ويقولوا الاقتصاد اتدمر، والسادس مواطن بيسوق عربيته على سرعة 160 كيلو، ومش بيعمل صيانة، ولما العربية تتقلب يقول الطرق السبب والحقينا يا حكومة».

 

استكمل: «النوع الأخير هو المبرراتي لكل الناس اللي فاتوا، يقول إن العيب مش منهم، عشان يحقق مكاسب سياسية»، مشيرًا إلى أن «أكبر خطأ ترتكبه حكومات مصر المتتالية أنها تهتم بالحجر ولا تهتم بالبشر، تعمل طرق ومتعلمش الناس تسوق كويس، بنصلح ثقب في مركب وسايبين ثقب تاني، مع أن المياه برضو هتيجي وتغرقنا».

 

أكد أن «الدول تنجح حينما تكشف عن عيوبها، عيوب إرادة وحكم ومحكومين.. ربنا حامي البلد.. لكن مفيش بينا وبين ربنا عهد إن البلد هتتقدم من غير ما نغير نفسنا، ربنا اللي قال على لسان سيدنا يوسف (ادخلوا مصر إن شاء الله آمنين)، قال على لسان سيدنا موسى (نجيني من القوم الظالمين)».