اوعى تنسى تسيب مكان للغرزة
مقالات مختارة | بقلم :ريهام عادل رشدي
٢٠:
٠٩
م +02:00 EET
الثلاثاء ١٤ فبراير ٢٠١٧
كنت زمان وأنا طفلة عندي تقريبا 8 أو 9 سنين، أقعد جنب جدتي الله يرحمها وهي قاعدة على ماكينة الخياطة الـ singer وتقص القماش بالمقص، وطبعاً تضبط أماكن الخياطة في القماش بالدبابيس اللي في الآخر بتكون خطوط مستقيمة، وهي دي اللي كانت بتمشي عليها بإبرة الماكينة لحد ما تخيطها صح وتتطلع مضبوطة.
كنت أنا طبعا بتفرج وخليت أمي تشتري لي ماكينة لعبة بلاستيك علشان لما أقعد جنب جدتي أعمل نفسي بخيط علشان معملش دوشة؛ كنت بطلب من جدتي قماش وكانت هي تجيب القصاقيص اللي على الأرض جنبها وتقول لي "خيطي دول ولما تخلصي هتاخذي غيرهم.. بس ابقي سيبي مكان للغرزة اللي بتصلح".
أنا طبعا رديت عليها "غرزة إيه يا ستي؟! أنا هخيط زيك كله خط واحد".
كان ردها "لأ يا حبيبتي أنا بسيب حتة صغيرة تكون مكان للتصليح.. لو كان ضيق يتوسع.. ولو كان واسع يضيق.. ولو كان غلط أفكها من عند مكان الغرزة وأعيد الخياطة تاني.. لازم تسيبي غرزة للتصليح أحسن القماش كله يبوظ منك".
طبعا فهمت في الوقت ده إني لازم أسيب غرزة لفستان عروستي، لكن لما كبرت وجدتي توفاها الله وقعدت أتكلم مع أمي وأقول لها "ستي كانت صح في موضوع الغرزة ده لأني كنت بخيط بلوزة ولما سيبت الغرزة صلحت الخياطة الغلط "، كان رد أمي "جدتك كمان كان بتسيب غرزة للعلاقات اللي حواليها مش للقماش بس".
وقتها فهمت المعنى العميق اللي كانت تقصده.. كتير مننا بيفسد علاقات بقالها سنين لمجرد إنه قفل كل الغرز ومفيش مكان تاني نصلح منه العلاقة اللي انقطعت، كتير مننا معملش بروڤة على الكلمات اللي ممكن يقولها في خناقة تفسد أو تجرح الشخص اللي قصاده، لمجرد أنه بيفضي شحنة غضب وبعد كده يرجع يندم.
الغرزة لما تتساب زي الباب المردود.
مع أبوك و أمك سيب غرزة كبيرة علشان دول غرزتهم والجنة.
مع مراتك في الخناقات سيب غرزة.
مع صحابك سيب غرزة.
مع جيرانك سيب غرزة.
مع مديرك في الشغل سيب غرزة.
مع عربيتك وإنت سايق سيب الغرزة وإوعي تآخذها.
من الآخر الغرزة زي الباب المردود.. سيبها علشان لما تحب تدخل تصلح تبقى موجودة وسهلة.
