أعداء الحياة

 عارف زي ما فيه لكل إنسان ناجح أعداء للنجاح، أؤكد لك أن فيه لكل إنسان منا عايش على الأرض أعداء اسمهم أعداء الحياة، بس الفرق الوحيد أن أعداء الحياة دول مش أعداء وبس، لا دول كمان ممكن نوصفهم بأنهم حرامية للحياة، ولكن المشكلة الأكبر أنك أنت اللي بتخلق أعداء الحياة دول بنفسك!، أه صدقني، أنت اللي بتخلقهم بتفكيرك فيهم، يعني لو نجاحك أوجدلك أعداء للنجاح، فأنت بتفكيرك في بعض الأمور أوجدت أعداء لحياتك في حياتك!

فكرة مثلاً أنك دايماً بتفكر في اللي راح من إيدك وتقعد تندب حظك غير الأسطوانات المشروخة اللي تفضل تقولها من عينة: “أصل ربنا مش بيحبني، أصل ربنا خلقني وسابني، ليه كل حاجة بحبها بتروح مني!” وبيبقى فاضلك سنة وتتحول لمصطفى شعبان في الفيلم لما كان بيقول محدش بينجرح أوي غير لما بيحب أوي!، وبتنسى دايماً أن أكيد ربنا عمل كده لتدبير يمكن متعرفهوش أنت دلوقتي، لكن صدقني هتعرفه وتعيشه قدام، المهم تثق فيه وتستسلم لعمله في حياتك، خليه يكتب هو السيناريو وكفاية بقى تتوقع أيه اللي جاي، كان فيه بيت شعر حلو أوي بيقول: “أن كنت مكتئباً لعز قد مضى هيهات أن يرجعه إليك تندم”، يعني من الأخر صدقني ندمك ده مش هيفيدك فركز في دلوقتي واللي معاك حالياً.